2 сентября, 2025 - 09:03
Аскер вузлада билим алып, ызы бла борчларына кертичилей къала, жетишимле болдургъанларыбыз асламдыла. Аладан бириди тамата лейтенант Чочайланы Зейтун. Энчи аскер операция башланнганлы бери да анга къатышханлай келеди эмда кёп болмай «Аскер айырмалылыкъ ючюн» деген майдал бла саугъаланнганды. Бюгюнлюкде Чочай улу РФ-ни миллет гвардия аскерлерини федерал службасыны 3442-чи аскер бёлюмюню связына башчылыкъ этеди.
Ол узакъ эмда ариу эллерибизден биринде – Бызынгыда – аппасы Татуну бла ыннасы Толгъурланы Жамийни жомакъларына, таурухларына тынгылай, аллай огъурлу, хурметли да къартланы къатларында таматалагъа сый-намыс берирге, юйде къайсы этилирге тийишли жумушну да тамамларгъа тюшюне ёсгенди.
Чочайланы юйюрлери Нальчикге кёчгенлеринден сора уа, жаш мында 13-чю номерли гимназиягъа жюрюгенди. Тарыхдан, физикадан, обществознаниядан дерслени айырып сюйгенди. Орус тилни грамматикасын иги билгенин, халатсыз жазгъанын да устазлары белгилегенлей тургъандыла. Алай болмазгъа уа амалы да жокъ эди – анасы Аслижан Алимовна, шахарыбызда таныулу педагог, биринчи номерли интернат-школгъа жюрюгенлени, саулукълары бла байламлы энчиликлери болуп, юйде туруп окъугъанланы бу дерсден юйрете, жетишимли болгъанлай келеди.
Зейтун аскер форма киерге, бу жаны бла кесин сынап кёрюрге сюйгенди. Ол мурат бла Бабугентде орналгъан экинчи номерли кадет школ-интернатха документлерин жыйышдырып, берилирге тийишли сынауладан да ётюп, анда билим алгъанды. Бу мектепде окъугъан кезиуюнде да спорт жаны бла эришиулеге, дерс олимпиадалагъа да къатышханлай тургъанды.
Алай бла жетишимлерине тийишлиликде спортну устасына кандидат болгъанды. Малкъар тилден бла адабиятдан устазы Башийланы Зухураны башчылыгъында чыгъармачылыкъ конкурсха къатышып, кёчгюнчюлюкню юсюнден видео халда хазырлагъан хапары ючюн саугъа бла белгиленнгенди.
Кадет болгъан кезиуюн эсгере, юйретиучюлени барысына да, алагъа жаланда класс башчылыкъ угъай, эгечлик да этип тургъан устаз Бёзюланы Жансурат Мухарбиевнагъа, бирсилеге да ыспас этеди. Мектепни жамауат ишине тири къатышхан, окъууда да жетишимли болгъан жашны атасы Хызыргъа бла анасы Аслижаннга дайым да КШИ-ни администрациясы ыразылыгъын билдиргенлей тургъанды.
Интернат-мектепни жетишимли бошап, Санкт-Петербургда СССР-ни маршалы Семён Будённый атлы Связыны аскер академиясыны кёп каналлы телекоммуникациялы системала (МТС) факультетини темир чыбыкълы (проводной) связьны системаларын хайырланыу эмда кийириу специалитетине окъургъа киреди.
Алай а, вузну кесини ичинде бериллик сынауланы да тынгылы бергенликге, мында жаш адамланы бир айны ичинде башха тюрлю, мында тохташдырылгъан низамгъа тийишлиликде сынайдыла. Эм алгъа аланы къыйын аскер болумлагъа эмда низамгъа чыдамлылыкъларына, тёзюмлюлюклерине да къарагъандыла. Жарсыугъа, аланы кётюралмай, кетип къалгъанла да боладыла. Таулу жаш а, ата-анасыны, бирси жууукъларыны да ышаныуларын алдамай, аллында салыннган борчладан айыпсыз ётгенди.
Ал кезиуде къайсы окъууда, ишде да тынч болмагъаны белгилиди, курсантлагъа да – алай. Аланы бош заманлары да аз къалады. Алай эсе да, Чочай улу спорт бла кюрешгенин бир заманда да къоймагъанды. Андан сора да, ол китап окъургъа, усталыгъы бла байламлы литератураны да сюеди. Автомобильледен ангылаууна уа ким да сукъланырчады. Бу жаны бла байламлы ол кёплеге болушлукъ этгенлей келеди.
Къадары алай тюшюп, бюгюнлюкде жюреги жаратхан иш бла кюрешгенине ыразыды. Анга академияда да кёз-къулакъ болгъанлай, ёз сабийлеринеча къайгъыргъанлай тургъанланы барысына да ыспас этеди. Анда хар къайсы устазын да кесини къадарында бир энчи тюбешиунюча кёреди. Аланы барысындан да кёп затха тюшюне, жашаугъа, усталыкъгъа да кёз къарамы кенгере, ангылауу да айный баргъанын айтады.
Аны муратларындан бири тамблагъы кюннге ышаныулукъну кючлеудю. Жер юсюнде аллай ышаныулукъ дайым да болгъанлай турурун сюеди. Жашауда кеслерини билимлерине, окъууларына ышаннганланы, усталыкъларында профессионал даражагъа жетишгенлени хурметлейди. Жамауатны алгъа элтирикле, не жаны бла да айныугъа къошумчулукъ этерикле ала болгъанларына толусунлай ышанады.
Зейтун сагъынылгъан академияны 2020 жылда бошагъанды. Диплом ишин къоруулагъанда уа, офицер чыннга да тийишли болгъанды. Алайдан аны Челябинск областьха Екатеринбург шахарны тийресине РФ-ни миллет гвардия аскерлерини 546-чы полкуна ашырадыла. Анда аны аскер къуллукъну жалчытыу ротасыны связь эмда информациялы технологияла взводуну командири болуп, къуллугъун бет жарыкълы толтургъанды. Огъарыда биз аны тамата лейтенант чында болгъанын айтханбыз. Жууукъ заманда энди капитан чын бериллиги да белгиленнгенди.
Кертиди, таулу жашны усталыгъы бла байламлы жолу аллай ётгюр жашларыбызны барлыгъына барыбыз да къууанырча этеди. Аллайларыбыздыла халкъны атын ахшылыкъ бла айтдырлыкъла, аны айнытырыкъла да.
Кимден да бек аны халкъына жарарыкъ адам болурун аппасы Керменланы Алим сюеди. Кёпню сынагъан къарт тамата туудугъуну солуугъа келир кезиуюн да ашыгъып сакълайды. Зейтун да отпускда болса, эм алгъа аны жокъларгъа, кёлюн кётюрюрге ашыгъады. Узакъда тургъан заманында да, къуллугъундан бош заман чыкъса, анга сёлешгенлей, саулугъун соргъанлай турады.
Шахарда ёсюп, узакъ жерледе окъугъан, ишлеген да жашны малкъар тилде ахшы сёлешгенин да белгилерчады. Бюгюннгю болумубузда тауча сёлешгенлени эшитген жюрегибизге хычыуунду.
Жашауда шуёхлукъ жюрютюуню ол къадарны бир насыбына санайды. Кесини биргесине бу ызда окъугъан Ахмедланы Рамазан, Насталаны Расул бла да бир бирлерине сакъ болгъанлай, къайгъыргъанлай турадыла. Аны юйюр насыбы да тутханды. Юйдегиси Гемуланы Жаннета бла бирге жашчыкъ да ёсдюредиле.
Къайда да белгиленнген, айырмалы болгъан жаш тёлюбюз бла ёхтемленнген бизни барыбызгъа да хычыуунду. Не жашырлыгъы барды, кесим демегенни эки эрини бирге жетмейди деп да буруннгулуларыбыз бошдан айтхан болмазла. Аны ючюн а ариу къылыкълары, низамлары, ачыкъ ниетлери бла бюгюнлюкде атлары къалай айтыла эселе да, тамблагъы кюнде тутхан ишлеринде бийик усталыкъ даражагъа жетишип, дагъыда белгиленнгенлей турурла деп да ышанабыз.
ТРАМЛАНЫ Зухура.
