14 октября, 2025 - 09:12
Мени бюгюннгю ушакъ нёгерим тёгерегине ариу хал, татлылыкъ, халаллыкъ жаяды.
Ол «Orengo» кондитер брендни иеси Эфендиланы Каринады. Кеси аллына энчи ишин ачып, эринмей бардыргъанды. Бюгюнлюкде ол ишлерге сюйюп, кеси кючлерине базыналмай тургъан жаш адамлагъа урунуу жолуну юсюнден айтады. Биз да кёпле, кеси кючлерине ийнанып, бу юлгюге кёре ахшы атламла этерлерине ышанабыз.
- Карина, мен билгенден, усталыгъынг, бийик билиминг да экономика бла байламлыды. Сен бу ашланы дуниясына къалай келгенсе?
- Гитче заманымдан башлап аш этерге бек сюйгенме. Бегирекда жангы затланы хазырларгъа итине эдим. Бир жерде жаратхан ашымы тюз алай къайтармай, кесимден бир тюрлениу, жангы зат къошуп, хазырларгъа сюе эдим. Анамы эгечи Джамиля, хар заманда мени кёллендирип, бу ишге сюймеклигими бегирек кючлендиргенди. Анга бек ыразыма. Алгъын Интернет былай эркин болмагъан заманда газет сатхан киоскну сакълаучум бюгюнча эсимдеди. Ары аш хазырлауну юсюнден хар геуюрге кюн жангы журнал келиучю эди. Ма алай бла эшитгеними, жаратханымы окъуп, излеп, кесим келишдирген ашладан башланнганды бу ишге сюймеклигим.
- Татлы ашлагъа уа къачан кёчгенсе?
- Окъууну бошап, Москвада банкда бир ауукъ заманны ишлегенме. Ол кезиуде анда бир татлы ашла хазырлагъан рестораннга барабыз да, меренгадан этилген бурулманы анда кёреме. Татыуун, кёрюмдюсюн да жаратама. Сора баш иеми ишини юсю бла Нальчикге, кёчерге тюшеди. Къайын анамы уа ол кезиуде «Прада» деп ашханасы бар эди. Юйде гитче миксер бла аллай бурулманы меренгадан кесим хазырлап кёреме. Юйюрюм бек жаратады. Артда шуёхларыбызгъа, бираздан аланы шуёхларына бла тенглерине, танышларына да бирден бирге айта, хапар жайылады да, заказла алып, ишлеп башлайма. Эркин къалгъаны болса, анабызны ашханасында сала эдик. Кеси аллыма, юйден башланнганды бу жумушум деяллыкъма. Бюгюнлюкде быллай кофейняларыбыз алты жерде ачылыпдыла.
- Аш-азыкъ бла байламлы къайсы бизнес да бираз къоркъуулу болур: аш кереклени хайырланыр заманлары озар, зыраф болурла дегенча ауара чыгъар?
- Сёзсюз, ол алайды. Къоранчсыз къошулгъан да эте болмаз. Хар заманда да бийик качестволу продукцияны хайырланабыз. Охо да, кёрюмдюсю ариу жасалсын, менден кетсин, кимге да жетсин деген оюмну тюзге санамайма. Аз да болсун, татыулу, ышаныулу болсун. Ол заманда атынг да иги бла айтылады.
Жамауат бир кесек къыйыныракъ болгъанды. Аланы излемлерин жалчытхан тынч болмагъанын эсде тута, хар хазырлагъан затыбызны, аш болсун, десерт неда татлы суусапла болсунла, жууаплы кёзден къарайбыз. Ол жетишимге элтген жолладан эм магъаналысыды. Бюгюннгю кюннге дери 9-10 жылны ичинде бу жорукъладан таймай ишлейбиз. Алгъындан эсе, бу арт жыллада къыйыныракъ болгъанды ишни бардыргъан.
- Заказла бламы ишлейсиз огъесе ашханаларыгъыздамы сатыладыла тортларыгъыз, десертлеригиз?
- Заказла да алабыз, кофейняларыбызда да сатыладыла. Андан сора жылны кезиуюне кёре, сатыу да алай тюрленеди. Сёз ючюн, жаз башында бла жайда адамыбыз азыракъ болады. Алай, сатыу тохтамайды, иш, алгъынча, къыстауду. Асламысында тойлагъа, къууанчлы жыйылыулагъа, къурманлыкълагъа бла байрамлагъа заказ бередиле да, кесибиз десертлени хазырлагъандан тышында, барып, жарашдырып, сыйларгъа да болушабыз. Адамларыбызны саны да, усталыкълары да анга жетеди.
- Жаланда татлы ашарыкъламы хазырлайсыз?
- Эки ыз бардырабыз. Мекямларыбызны тёртюсюнде «Orengo.cake» десертледиле. Алада харкюнлюк витриналада 50-ге жууукъ десертлени тюрлюлери салынадыла. Кертисин айтханда, излем да уллуду. Бир келип кёргенле, дагъыда кёп кере къайтадыла. Мекямларыбызны экисинде уа, «Orengo.food» деп атлары алайды, татлы ашладан сора да, европалы ашла бардыла. Эрттен ушхууурну тизмеси да уллуду.
- Ишигизде хайырланнган керекли затланы къайдан аласыз?
- Кёп болмай Нальчикни сют заводу бла келишим этгенбиз. Аланы продукциясыны качествосу игиди. Аны себепли, республикадан тышына чыгъа турмай, хайырлы байламлыкъны кесибизде къураргъа сюйгенбиз. Ол файда да кеси регионубузда къалса, тюз болур. Сууну юсюнден айтханда, бизде «Бабугент» суу сатылса, тюзге санайма. Кеси адамларыбызгъа иш юсюнде кесибиз тутхучлукъ этиу аман болмаз. Нек эсе да, жамауат тышындан келген затны бир аламат сунады. Багъа эсе, аны игиге санайдыла. Кесибизни продукциягъа жетген жокъду. Юлгюбюз бла адамларыбызгъа аны ангылатыргъа кюрешебиз.
- Жангы келген алыучуларыгъыз, къонакъларыгъыз болур ючюн, десертлеригизни тюрлюлерин кёбейтирге тюше болур?
- Хар ыйыкъдан бир жангы зат жаратылады. Бирлерин кесибиз къурайбыз, бир-бирлерин жолоучулукъда кёрген затларыбызны кесибизча тюрлендирип чыгъарабыз. Мастер-классла да бек кёп бардырабыз. Адам хунерин, усталыгъын къуруда ёсдюрюрге керекди. Жашау терк тюрленип барады, аны себепли хар жангы кюн жангы излем бла тууады.
- Бу ишге салгъан къыйынынг хайырлыды деяллыкъмыса?
- Аллахха шукур, бюгюнлюкде мен сюйген ишим бла кюрешеме. Адамланы кёллерин, халларын жарыкъ этерге излейме. Жаланда халал кереклени хайырланама. Алыучуларыбызны, къонакъларыбызны ыразылыкълары мени бек къууандырады. Аны ючюн къыйналыргъа да боллукъду, кесибизни аямай. Мюлк жаны бла къарагъанда уа, къайсы проект да, къайсы башламчылыкъ да сюймеклиги бла, кёлю бла башланса, хайырлы болмай амалы жокъду.
- Юйюрюнг бла окъуучуларыбызны да шагъырей этсенг эди?
- Баш ием Аушигерден Эфендиланы Борисди. Къабартылы юйюрню келиниме. Кесими да анам Зумакъулланы Асхатны къызы Назиляды, бек белгили юйюрню туудугъу болгъаныма ёхтемленеме. Атам а, Сагов Саварбек, ингушлуду. Кёп миллетли юйюрденме дерге боллукъма. Баш ием бла бирге тёрт сабий ёсдюребиз. Эм абаданыбыз Магометни он жылы болады. Экинчи жашха аппасыны атын атагъанбыз – Асхат. Аны гитчеси къызчыкъды – Сара. Эм гитчеге уа алыкъа жети ай болады, атына Саид деп атагъанбыз. Ариу къылыкълыла болуп, аналарыны, аталарыны тиллерин да, миллет энчиликлерин да билирле эм багъаларла деп ышанабыз.
Темуккуланы Асият.
