27 января, 2026 - 09:46
Занкишиланы Карина республиканы Психиатрия эм наркология клиникалы арасында сабий бёлюмде врач-психиатрды. Ол анда алай эрттеден тюйюл эсе да, жамауатдан ыразылыкъ табып, ыспасха тийишли бола ишлейди.
Карина Нальчикде ёсгенди. Юйюрню таматасы болгъаны бла бирге уа, эсли къызчыкъны хар неге да сейири энчи эди. Бютюнда бег а ол юйде анасы Темуккуланы Мариямны, амбулаторияда врач-терапевт болуп ишлей, адамлагъа къаллай болушлукъ этгенин кёре, аныча акъ халат киерге, саусузланы жапсарыргъа, алагъа себеплик этерге сюйгенди.
Биринчи классдан да иги окъуй, тенглерини арасында алчы болгъан сабий артда алада химия дерс башланнганында, анга бютюнда эс бургъанды. Нек дегенде аллай бирге сейир бергенди устаз аны темаларын, алай бла уа окъуучуланы кесине тынгылата да билгенди.
Орус тилден окъутхан Ирина Гераськинаны уа бюгюн да унутмайды, аллай устазла аз болгъанларын, ол салгъан мурдор анга бу дерсден ЕГЭ-де уллу болушлукъ болгъанын эсгере, аны билимине, адамлыкъ ышанларына да ыспас этеди.
Занкишиланы къызлары 32-чи номерли битеулю билим берген мектепни алтын майдалгъа бошагъанды. Анга, сёзсюз, тийишли болгъанын а Бир къырал сынауларыны эсеплери бла толусунлай ачыкълагъанды. Орус тилден бла химиядан – 100, биологиядан а 93 балла алып, республикада ол жылда ЕГЭ-леде эм ахшы кёрюмдюле болдургъанланы тизмесине тюшгенди.
Ызы бла уа ол Санкт-Петербургда академик Иван Павлов атлы биринчи къырал медицина университетни «Багъыу иш» бёлюмюне бюджетге киреди. Аны битеу да жетишимлерине уа аппасыны анасы, токъсан жылындан атлагъан Маржан, кимден да бек къууаннганды. Ол туудугъундан туугъан къызчыкъны сынаулада аллай бийик балла алгъаныны юсюнден жазылгъан газетни да сакълап тургъан эди. Билимге итиннген тиширыу сабийлери ёсгенден сора кеси да окъуп, артда устаз болуп ишлегенди, юйюрюне да окъууну жашауда магъанасын ангылатханлай тургъанды.
Карина, эм алгъа, стоматология ызны сайлар мурат да этген эди. Алай эсе да, ала бешинчи курсда болгъанларында, практикагъа Санкт-Петербургну алтынчы психиатрия больницасына барадыла. Анда уа алагъа лекцияланы психиатрия кафедраны доценти Иван Мартынихин окъугъанды. Аны сейир лекцияларына тынгылагъандан сора уа, таулу къыз усталыкъ бла байламлы кесини сайлауун бир кесек ёзгертирге сюеди эмда КъМР-ни Саулукъ сакълау министерствосунда целевой келишим этип, ординатураны Санкт-Петербургда В. Бехтерев атлы психиатрияны эмда психологияны миллет медицина тинтиу арасында ётюп, эки жылны ичинде билимин ёсдюргенди.
Иван Мартынихинни уа, билимли болгъанындан сора да, адамлыкъ ышанларын белгилейди. Ол университетни сайтын къурап, анда сынауланы бералмагъан жашлагъа бла къызлагъа аллай болумгъа бир уллу къыйынлыкъгъача, жарсыугъача угъай, аны болдурмазгъа къолдан келлик затхача къараргъа юйретгенине да сейир этеди.
- Къадарымда аллай адамгъа тюбегениме ыразыма. Ол психиатриядан бош теориялы лекцияланы окъуп, сюйсегиз ангылагъыз, сюймесегиз а, угъай деп къоймай, студентлеге жашаудан юлгюле да келтиргени, саусузланы юслеринден да алагъа жарсыуу, хурмети бла сёлешгени аны кесине да бизни хурмет сезимибизни къозгъай эди. Ол адамны жашауунда юч зат – аны юйюрю, саулугъу эмда тутхан иши – бир бирлери бла къаллай байламлыкъда болсала, анга къадарны сынауларындан къыйналмай ётерге боллугъун ангылатханы уа, жаланда психиатрияда угъай, хар инсаннга да билирге керекли шартла сунама, - деп хапарлайды устазыны юсюнден Карина.
Университетде, ординатурада билим алгъанында да кеси окъугъан вузну мурдорундагъы нейрохирургия бёлюмде медсестра болуп ишлеп тургъанды. Алай бла уа саусузла бла, аланы ахлулары бла да къалай сёлеширге кереклиси, врач гитче медицина персоналдан къаллай жууаплылыкъны излерге тийишлиси бла байламлы да сынам алгъанды. Бюгюнлюкде ол сынамы уруннган жеринде анга себепликди. Ала бёлюмню таматасы Юлия Георгиевна Кантиева, бирсиле бла да биригиулюкде, бир бирни ангылауда ишлейдиле. Аны бла бирге уа энди арада тынгылы ремонт этиле, къурулуш ишле башланнганларына да къууанадыла.
Ординатурада окъуй, илму-тинтиу ишни да бардыргъанды. Медицинада шизофрениядан къыйналгъанланы кёзлери тёгерекдеги затланы, болумну башха тюрлю кёргенлери айтыла келеди. Ол а алай нек болгъанын, аны сылтауларын тинтгенди, аланы жамауат нек ангылаялмагъанын да.
- «Психиатрия», «психиатр» дегенча сёзлени эшитселе, башхала угъай да, врачла кеслери окъуна къоркъгъан этедиле. Ол а, жаланда бизни къыралда демейме, саулай да жамауатда аллай аурууладан къыйналгъанлагъа алгъадан да къаллай кёз къарам тохташханы бла байламлыды. Алай эсе да, биз сабийлени ата-аналарына ангылатханлай, юйретгенлей турабыз. Багъыуну тийишлисича бардыралсала, жамауатха къошулургъа, жетишимли да болургъа онг чыгъарыкъды. Жаланда врачны айтханына тынгыларгъа эмда ол буюргъан затланы этерге тийишлиди ансы, - дейди ишини юсюнден Карина.
Аны бла ушакъны кезиуюнде ол усталыгъыны, саусузланы юслеринден къалай сёлешгенине тынгылай, кесини ишин сюйген эмда билген врач болгъанын да толусунлай ангылайса. Медсестрала ангылаялмагъан, эталмагъан жумушну кеси тамамлай, алагъа да кёргюзтюп юйретгени, ол кезиуледе уа саусузланы эмда аланы ахлуларыны орунларына кесин салып, бусагъатда аны болушлугъун сакълагъанлагъа себеплик этгени – ала барысы да аны усталыкъны жюреги бла сайлагъаныны шартларыдыла.
Айхай да, врачха, бютюнда психиатрия ызда ишлегеннге, дармандан тышында да, ариу сёзню хайырланыргъа керек болгъанлай турады. Карина да аны аллына келген ата-аналадан аямайды. Адамла ангыламагъан затларындан къоркъмазча, анга бегирек сакъ болады. Бютюнда башха тюрлю амаллагъа алданып, заманны оздурмазларына эмда врачха келирлерине къайгъыргъанлай турады.
Къарындашы Марат да анасыны, эгечини ызлары бла бара, медицинаны сайлап, стоматология жаны бла билим ала турады. Алайды да, Занкишиладан врачлагъа жууукъ заманда дагъыда къошуллукъду. Ол шарт а, кертиси бла да, аналары сабийлени бу усталыкъгъа сюймекликде юйретгенин ачыкълайды.
Мокъаланы Зухура.
