15 марта, 2022 - 15:40
«Нейрохирургием нэгъуэщIым и гъащIэм ухуэсакъыу уегъасэ. КъыбгуроIуэ, асыхьэтым а гъащIэр уэ куэдкIэ уэлъытауэ зэрыщытыр. Щыуагъэ зэрыпIэщIэмыкIынум зыкIи шэч къытумыхьэу операцэм укIуэн хуейщ», - жеIэ Москва щыIэ, ПIалъэ къызыхэкI мыхъуну сабий хирургиемрэ травматологиемкIэ щIэныгъэ-къэхутакIуэ институтым нейрохирургиемкIэ и къудамэм и унафэщI, Медицинэ щIэныгъэхэмкIэ Урысей академием сабийхэм я узыншагъэмкIэ и щIыныгъэ центрым и IэщIэгъэлI пажэ, медицинэ щIэныгъэхэм я доктор Семэн Жаннэ.
Лэжьыгъэ IуэхукIэ Семэным ирихьэлIа дэтхэнэ зыми къыбжиIэфынущ ар зи IэщIагъэм фIыуэ хэзыщIыкI дохутыр Iэзэу зэрыщытыр. ЦIыху гъащIэмкIэ жэуаплыныгъэ зэрихьыр нэсу къызыгурыIуа Жаннэ сытым дежи и щIэныгъэм, Iэзагъэм зэрыхигъэхъуэным хущIокъу.
- Дохутыр сыхъуным щIэхъуэпсыр си адэ-анэрт, ауэ иужьым сэри абы сыдихьэхащ, - жеIэ Семэным IэщIагъэр къызэрыхихам и гугъу щищIкIэ. - Къэбэрдей-Балъкъэр къэрал университетым и медицинэ факультетым и етIуанэ курсым дыщIэсу лэжьыгъэ и пIалъэ къэтщIэн папщIэ Республикэ клиникэ сымаджэщым дагъэкIуащ. Мис абы щыгъуэ нейрохируг Былымгъуэт Борис и лэжьэкIэр щыслъагъум, сэ хьэкъыу спхыкIат дохутыр сыхъуну сызэрыхуейр. ИкIи мурад быдэ сщIащ нейрохируг сыхъуну. ЩIэныгъэми лэжьыгъэми щысча япэ лъэбакъуэхэм сытезыгъэгушхуар Былымгъуэтырщ. Ещанэ курсыр къэзуха иужь, Республикэ клиникэ сымаджэщым нейрохирургиемкIэ и къудамэм медсестрауэ лэжьэн щыщIэздзащ. Мис абы щыгъуэм къыхэсха IэщIагъэм и щэху куэд къэсщIащ.
Университет нэужьым Жаннэ и щIэныгъэм щыхигъэгъэхъуащ Москва щыIэ, Бурденкэ и цIэр зезыхьэ щIэныгъэ къэхутакIуэ институтым. Зэхихымрэ илъагъу псомрэ зыфIэгъэщIэгъуэн хъыджэбзыр и IэщIагъэм теухуауэ нэхъыбэ къызэрищIэнум хущIэкъуу щыIащ а институтым. Абы къыщIиха щIэныгъэр лъабжьэ быдэ зэрыхуэхъуар абы куэдрэ жеIэ икIи институтым щигъэкIуа илъэсхэр гуапэу игу къегъэкIыж.
- Бурденкэ и цIэр зезыхьэ щIэныгъэ-къэхутакIуэ институтым сыкъызэращтар си дежкIэ ехъулIэныгъэшхуэт, - жеIэ Жаннэ. – Урысей медицинэм и IэщIагъэлI пажэхэм сахэхуат. Куэд къыщысщIащ сэ абыхэм я деж. Си кандидат, доктор диссертацэхэр щыстхым щIэныгъэ унафэщIу сиIащ а институтым и унафэщI, дуней псом щыцIэрыIуэ нейрохирург Iэзэ Коновалов Александр. Абы операцэ щищIкIэ укIэлъыплъыныр гухэхъуэт, апхуэдизкIэ удихьэхырт абы и IэбэкIэми. Абы ищI операцэ хьэлъэхэм хуэдэ зыхузэфIэкI куэд къэралым искъым. Коноваловым дэслъэгъуа Iэзагъэр, зэфэкIыр сэ гъуазэ схуэхъуащ.
Зыпэрыт Iуэхури зыхэт гупри сыт хуэдизу игу ирихьми, ПIалъэ къызыхэкI мыхъуну сабий хирургиемрэ травматологиемкIэ щIэныгъэ-къэхутакIуэ институтым щрагъэблагъэм, Семэным и IэнатIэр ихъуэжащ. Къапщтэмэ, Жаннэ а институт цIэрыIуэм зэрырагъэблэгъар и Iэзагъэр къызэралъытэм и нэщэнэщ. Илъэс зыбжанэ хъуауэ ар а IуэхущIапIэм нейрохирургиемкIэ и къудамэм и унафэщIу мэлажьэ.
- Дохутыр цIэрыIуэ Леонид Рошаль сыдэлэжьэну Iэмал зэрызгъуэтамкIэ Тхьэм фIыщIэ хузощI, - жеIэ Жаннэ. – Iэзагъышхуэ зыхэлъ дохутыру зэрыщытым къищынэмыщIауэ, ар икъукIэ цIыху пэжщ, гуапэщ икIи шынэ зымыщIэщ. Ди институтыр сабийхэм дэIэпыкъуэгъу псынщIэ щагъуэт IуэхущIапIэщ. Ди къалэн нэхъыщхьэр зи щхьэ куцIым сэкъат игъуэта сабийхэм псынщIэу ди Iэзэгъуэр ялъыдгъэсэнырщ. Дакъикъэ къэс дыхуэхьэзыру щытын хуейщ зыгуэрым и гъащIэ къызэредгъэлыным.
Семэныр щIэх-щIэхыурэ къокIуэж щалъхуа щIыналъэм. Абы зэрыжиIэмкIэ, нэсу зыгъэпсэхуа щыхъур Налшыкщ. «Дэнэ дыщымыIами, псэр здэщыIэрщ унэр, - жеIэ Жаннэ. – Сэри си псэм и хэщIапIэр сыкъыщалъхуа щIыпIэрщ.