1 июня, 2022 - 12:33
Жомакълы жерлерибизде, тауларыбызда айлана турсанг, кёп сейир затлагъа тюбейсе. Кёп болмай Огъары Малкъаргъа баргъан эдик. Анда жол устабыз Османланы Сахадин Чайнашкы сууну боюнунда, Къоян Баз кюнлюм сыртны башында уллу тёртгюл ташха элтеди.
Адам къолу бла жоннганча, жанлары сыйдамдыла, тюздюле. Жанындан къарасанг, биреу келтирип орнатханнга ушайды. Тюбюню бир жаны жерге окъуна жетмейди. Кеси да бираз сёдегей турады. Жауун жауса, юсюнде тамычы къаллыкъ тюйюлдю. Бийиклиги да эки метрден асламыракъ болур.
Биз аны башына миндик. Бир мюйюшюнде, адам къолу тиймей, кеси аллына ишленнген чунгурчукъ барды. Аны ичинде челек чакълы суу жыйылыпды. Ингир ала аны кетерип, терен жерчикни сыйпап, къургъакъсытып кетсенг, эрттенликге биягъы чакълы суу алайгъа жыйылып турады.
Энди ташны сууундан чыпчыкъла, башха къанатлыла иче болурла, ала да кёп къоратмайдыла. Былай къарагъанда, бир кечеге чунгурчукъ суудан тола эсе, экинчи кюн а андан да кёп болуп, башы бла саркъыргъа керек эди. Алай болмайды. Суугъа къаллай бир тийилмей турса да, аны юсюне къошулмайды. Дайым бир тюрсде турады.
Муну атына Баззаны Губус Ташы дейдиле. Элде быллай таурух жюрюйдю. Онбир-онеки тёлю мындан алда Огъары Малкъарда Атабийланы Базза деп биреу жашагъанды. Аны сол къолунда губуслары болгъанды. Аланы тюплерин халы бла къысып, кетерип тургъанды. Алай ала дагъыда жангыдан ёсгендиле.
Бир кече Базза тюш кёреди. Анда бир акъсакъал анга былай айтады: «Алгъын жашагъан юйюгюзню баш жанында уллу тёртгюл таш барды. Аны башына чыгъып, сууу бла къолларынгы жуу». Базза ол айтханлай этеди. Сора аны юсюнден губуслары кетедиле. Андан бери анга Баззаны Губус Ташы дейдиле. Суратдагъы таш олду.
