13 октября, 2021 - 11:40
Огъары Малкъарны участкалы больницасында Чаналаны Ахматны къызы Аслижан таматалыкъ этеди. Хар жердеча, мында да коронавирус инфекциягъа къажау профилактика ишле бардырыладыла, вакцина пункт да ишлейди, адамлагъа вакцина салынады.
Медицина коллективде ишлеген врачла эм медсестрала жууаплыкъны толу сезедиле, ауруп алларына келгенлеге, стационарда жатхан саусузлагъа да бек иги къарайдыла. Эллиле алагъа бек ыразыдыла.
Адамладан ыспас ала ишлегенледен бири - медсестра Гузийланы Асиятды. Асият бу больницада эрттеден ишлейди. Ишин да бек уста биледи. Адамгъа укол этерге, капельницаны салгъа да къолу уста жарашады. «Жумушакъ къоллу Асият», - дейдиле анга эллиле. Керек болса, Асият врач бла бирге вызовлагъа терк чыгъады, адамгъа болушургъа бек сюеди эм терк табылады. Кече, кюн деп да къарамаучуду. Ариу сезлю, жумушакъ жюрекли, Гузийланы Асиятха Огъары малкъарлыла дайым ыразылыкъларын билдиргенлей туручудула. Кеп болмай манга жолукъгъанында, Хозаланы Нина Асиятны атын уллу хурмет бла айтхан эди, бизден къайтмаса да, анга Аллахдан къайтсын деген эди.
Быллай сезле бошуна айтылмайдыла, жюрекден келедиле. Ишингден, жашауунгдан да къууан, Асият!