6 октября, 2021 - 10:44
Герийланы Наныканы жашы Хусейн Черек муниципал районну спорткомитетинде баш специалист болуп ишлейди, бийик категориялы тренерди, «Заслуженный работник физической культуры и спорта КБР» деген сыйлы атны жюрютеди. Спорт бла физкультуруны, АРБ-ны айнытыугъа къошхан уллу къыйыны ючюн, жаш телюню патриот ниетде юйретгени ючюн да Хусейн Россей Федерацияны спорт жаны бла министрини, КъМР-ни Правительствосуну эм КъМР-ни «Союз ветеранов Афганистана, локальных войн и военных конфликтов» деген жамауат организациясыны сыйлы грамоталары бла саугъаланнганды.
1987-1990-чы жыллада ВЛКСМ-ны Совет райкомуну «Ачемез» деген жаш телю центринде таматалыкъ эте тургъанлай, Герийланы Хусейн Бабугент элде АРБ-деген (армейский рукопашный бой) спорт дисциплина бла кюрешип, сабийлеге да жарау этдирип тургъанды. Он жылдан сора, Хусейн туугъан эли Бабугентде бу спорт бла кюреширча белюм ача туруп, юйретген жашчыкъла бийик жетишимлеге жетерлерине ийнаннганды.
Ол жыллада сабийле жарау этерча спортзал окъуна жокъ эди, жалан да жюрек итиниу эм талпыныу! Сабийлени, ата-аналаны, битеу да элни болушлугъу бла Бабугентни эски эл клубун жарашдырып, спортзал къурашдырып, бирге ахча жыйып, жарау этерге кюйюз эм спорт инвентарь алгъан эдиле.
Сабийлени жыл санларына кере группалагъа белюп (10-17 жылгъа дери), тренер Герийланы Хусейн АРБ-дан алагъа жарау этдирип башлайды. Жашчыкъла арымай-талмай кюреше эдиле. Тынч тюйюл эди, алай жаш спортчула кюнден кюннге къарыуларын кючлей, аз-аздан эришиулеге эм сборлагъа къатыша башлайдыла. Спортда биринчи жетишимле, бийик атламла 2007-чи жылда Тольятти деген шахарда бардырылгъан Россейни АРБ-дан 13-чю первенствосунда болдурулгъан эдиле. Анда Герийланы Руслан 1-чи жерни, Мокъаланы Кемран 2-чи жерни алгъан эдиле.
Андан бери «Бабугент» спортклуб кеп жетишим болдургъанды, бюгюн да дайым болдургъанлай турады. Герийланы Хусейн юйретген жаш спортчуланы атлары битеу республикагъа да белгилидиле. Аланы ичинде къыралыбызны кеп тюрлю жерлеринде аскер къуллукъларын бийик даражада толтургъанла, аскер жаны бла бийик окъуу юйлени бошап, офицерле болуп чыгъып, иги жерледе ишлегенле, шендю курсантла да бардыла. Газетни бир бетинде быланы барыны юсюнден да энчи жазаргъа онг жокъду. Болса да бир къауумланы атларын сагъынайыкъ.
Эндрейланы Аслан Воронежде «Военно-Воздушная Академия имени Жуковского и Гагарина» деген бийик окъуу юйню курсантыды. 3-чю курсда окъуйду. АРБ-дан Россейни спорт устасыды. РФ-ны къоруулау министерствосу АРБ-дан бардыргъан эришиулерине тири къатышады. Окъууда, спортда да алчыладан бириди. Академияны жыйымдыкъ командасыны члениди. Башийланы Альберт – 75 килограмм ауурлукъда Россей Федерацияны МВД-сыны АРБ-дан чемпионуду. АРБ-дан РФ-ны спорт устасыды. РФ-ны МВД-сыны Саратовдагъы военный институтун бошап, бусагъатда КЪМР-ны УВД-сында ишлейди. Безюланы Салим – СКФО-ну МВД-сыны баш управлениясында ишлейди. Холамханланы Алим да «Санкт-Петербургский военный институт войск национальной гвардии» деген вузну 3-чю курсунда окъуйду. Аккыланы Хызыр – «АРБ-дан Россейни спорт устасы» деген атны жюрютеди. Къарындашлары Эльяс эм Амин да андан артха къалмайдыла. Каркаланы Омар «Астраханское суворовское военное училище МВД России» деген окъуу юйню курсантыды.
- АРБ – къуру спорт тюйюлдю, ол - жигер жашауду. Биз къуру спортчуланы хазырламайбыз, тюз ниетли патриотланы хазырлайбыз, жашла къуру кюч сынау бла къарыулу тюйюлдюле, жюрек сезимлери бла да къатыладыла, - деп ехтемленеди Герийланы Хусейн.
Кесини юч жашы уа Герийланы Хусейнни энчи ехтемлигиди. Алада да атлары айтылгъан спотчуладыла: Руслан – «АРБ-дан Россейни спорт устасы», Эльдар – Россей Федерацияны самбодан спорт устасыды, кичи жашы Абдулкерим - Бабугентни орта школуну 10-чу классыны окъуучусуду. Республикада, Россияда бардырылгъан эришиулеге да къатышып, кеси бла тенглени ичинде биринчи жерлени алады. АРБ-дан КЪМР-ны жаш телю жыймдыкъ командасыны члениди. Команданы составында, Анапада бардырылгъан битеуроссей «Фестиваль боевых искусств» деген эришиуледе хорлагъанды.
Жашла мындан ары да аталарыны эм «Бабугент» деген спортклубну атын махтау бла айтдырырларына ишеклик жокъду!
Хозаланы Фатима.
