24 октября, 2023 - 15:40
Барыбыз да билгенликден, ахшы жетишимле болдургъан устазлагъа энди КъМР-ни Башчысыны оноуу бла саугъала бериледиле. Быйыл бу жаны бла эришиуде оноулан айырмалы болгъандыла. Нальчик шахар округну энчи алып айтханда уа, мында жетишимлилени тизмесинде бешеулендиле. Аланы санында уа 6-чы номерли битеулю билим берген мектебини тарыхындан бла обществознаниядан устазы Локияланы Жаннета да барды.
Ол бийик категориялы педагогду, ёсюп келген тёлюню отуз жылдан аслам заманны ичинде окъутуп эмда юйретип келеди. 2017 жылда «Жылны устазы» битеуроссей усталыкъ эришиуню лауреаты да болгъанды. Иги кесек Сыйлы грамотала, дипломла, Ыразылыкъ къагъытла бла да белгиленнгенди.
Былтыр а методикалы тинтиуле бла байламлы «Финансла жаны бла окъуулулукъ» деген ат бла озгъан регион даражалы конкурсну алчысы болгъанды. Он жылдан аслам заманны ичинде мектепни тарыхдан бла географиядан устазларыны методикалы биригиулерине башчылыкъ этеди. Сагъынылгъан дерследен окъутханланы республикалы методикалы къауумуна да киреди.
Юч жылны ичинде тарыхдан бла обществознаниядан ОГЭ-леге къарагъан предмет комиссиягъа таматалыкъ этгенди. Андан сора да, ГИА-лагъа, бу дерследен бардырылгъан регион даражалы олимпиадалагъа аны дайым да чакъыргъанлай турадыла.
Билим бериуде ишлегенлени усталыкъ хунерлерин тохтаусуз ёсдюрген ара бла байламлыгъын юзмей, мында лекцияла окъуйду, мастер-классла бардырады. Алай бла уа жаш устазлагъа, бирсилеге да сынамын юйретеди. Сабий чыгъармачылыкъны «Кюн шахар» академиясыны социал-гуманитар бёлюмю бла байламлыкъда алтынчы номерли мектепни мурдорунда «Обществознаниядан олимпиадагъа хазырлау» деген къошакъ программаны жашауда бардырады.
Озгъан окъуу жылда Локияланы Жаннета окъуучуланы битеуроссей дерс олимпиадаларында обществознаниядан шахар урумда – юч, республикалы кезиуде уа бир призёрну хазырлагъанды. Хунерли эмда саулукълары бла байламлы энчиликлери болгъан сабийле бла да энчи кюрешеди. Дагъыда ол кесини билимин, сынамын да жаш устазлагъа юйретеди, алагъа насийхатчылыкъ да этеди.
