26 октября, 2023 - 15:34

Быйыл 9-чу классны айырмалы бошагъан жаш тёлюбюзню асламы усталыкъ алыуларына себеплик этерик колледжлени сайлагъандыла. Тохаланы Аслан да ол къауумданды. Яникой элни орта школун жаланда бешлеге бошап, жашауун медицина бла байламлы этерге таукел болгъанды.
Башланнган классладан тебиреп, хар окъуу жылын да ол айырмалы бошагъанды. Математикадан, ингилиз тилден тюрлю-тюрлю район эи республикалы олимпиадалада биринчи жерлеге тийишли бола, школну атын иги бла айтдыргъанды.
Асланны медицина колледжни сайлауу да бошдан болмагъанды. Ол аны бошагъандан сора да, андан ары окъур муратлыды.
- Мен оюм этгенден, медицина факультетге колледжден сора кирген бютюн игиди. Билиминг, сынамынг да анга себеплик этерикдиле. Муратым – билимими хайырын чыгъарып, саусузлагъа багъаргъады, - дейди ушакъ нёгерим.
Андан сора да, Асланны IT-технологиялагъа сейири уллуду. Онгу болгъан къадарда анга да эс бёлюрге сюеди. Медицинадан сора экинчи уллу мураты уа режиссёр болуп, кинематографияда жангы жанр къураргъады.
- Адамла киногъа къарагъандан сора, заманларын толу хайырланмагъанларын ангыларча этерге сюеме, - дейди ол.
Тенглерини араларында сыйы жюрюген Аслан кеси да шуёхлукъгъа уллу магъана береди. Аны оюмуна кёре, хар ким да кесине тенгнге ышаныулу адамны сайларгъа керекди – къыйын, керек заманынгда къатынгда туруп, билеклик эте биллик. Ол кеси да аллайды. Шуёхуна болушлукъ керек къадарда, не да этип, анга эс тапдырыргъа излейди.
Шёндю Аслан колледжге кириу бла байламлы жумушла бла кюрешеди. Айырмалы аттестат бла бюджетге тюшюп, степендия да алып, анасын къууандырыр муратлыды.