1 июля, 2023 - 13:59
Кёп болмай Къабарты-Малкъар къырал аграр университетни студентлерини бла магистрлерини профсоюз комитетлерини таматасы, «Агрономия» бёлюмню магистри Забакъланы Азамат «УМНИК» битеуроссей конкурсда грантха эм «SUSTAINABLE DEVELOPMENT FORUM-2023» деген экинчи халкъла аралы илму-практика конференцияда дипломгъа тийишли болгъанды.
Жаш алимни илму иши заранлы хансла бла байламлыды. Анга проектин бардырыргъа эл мюлк илмуланы доктору профессор Ирина Ханиева болушады.
Амброзия эл жерледе, шахарлада жайылыргъа ёчдю. Бахчалада, парклада эм тау бийикликледе окъуна тюбейди. Ол а биологланы бла медиклени къайгъы этдиреди. Къалайда да ёсерге кюч тапхан ханс жыл сайын танг кесек жерни бийлейди. Болсада КъМКъУ-да аллерген битим хайыр келтирирча амал тапхандыла.
- Тинтиуле кёргюзтгенлерича, амброзияны къурамына танг кесек микро, макро элементле эм эфир жаула киредиле. Аланы эл мюлкде хайырланыргъа жарарыкъды. Анга кёре бюгюнлюкде багъалы семиртгичлени орунуна биопрепарат къурагъанбыз. Аныча алыкъа жокъду. Аны бла чекленип къалмай, мындан арысында да бу жаны бла тири ишлерге таукелме. Бюгюнлюкде препаратны нартюхню бла люцернаны ёсдюрюуде хайырланыргъа патент да алгъанбыз, - дегенди Забакъланы Азамат.
Аграр факультетни студентлерини грамоталарыны бла дипломларыны кёплюгю бёлюмню жетишимли ишлегенин ачыкълайды. Бу жолгъу саугъа да анга шагъатды.
***
Ингилиз тилден барысын да хорлагъанды
Байсыланы Ахматны жашы Руслан Оренбург областьны Акбулак посёлкасыны 3-чю номерли школуну 10-чу классыны окъуучусуду. Алгъаракъда ол ингилиз тилден тамата классланы окъуучуларыны араларында бардырылгъан Битеуроссей олимпиаданы регион бёлюмюнде хорлап, Москвада битеуроссей кезиуде областьны кёргюзтюрге эркинлик алгъанды.
Руслан кеси билдиргеннге кёре, бу хорламгъа ол 2019 жылдан бери келе эди. Сёз ючюн былтыр ол регионда ингилиз тилни бек иги билген 10 окъуучуну къауумуна тюшгенди.
- Битеу жетишимлери аны кесини итиниулюгюню хайырынданды. Не репетитор бла, неда къошакъ дерслеге жюрюмейди. Жаланда кесини сейири бла тилге. Видеороликлеге аслам къарап, алай юйренеди, – дейди Байсыланы Ахмат.
Регион кезиуде да Руслан ингилиз тилге юйретиу терен бардырылгъан школланы келечилеринден иги да аслам балла алып, алай хорлагъанды.
