1 июля, 2023 - 11:55
Малкъондуланы Русалинагъа алыкъа 10 жыл болады, алай бу кезиуде ол тюрлю-тюрлю даражалы эришиулеге къатышып,
12 майдалны алгъанды. Русалина художестволу гимнастка бла юч жылындан кюрешеди, хар спортчунуча, аны да мураты Олимпиаданы чемпиону болургъады.
Быйыл Уллу Ата журт урушда Хорламны 78-жыллыгъына аталгъан «Кубок Победы» ачыкъ турнирде ол кесини жыл санында айырмалы болуп, биринчи жерге чыкъгъанды.
Бу даражалы эришиулеге Къабарты-Малкъардан, Ставрополь эм Краснодар крайладан, Дагъыстандан, Шимал Осетиядан, Ростов областьдан бла Донецк Халкъ Республикадан 500-ге жууукъ жаш спортчу къатышханын айтырчады. Нальчикге Юг Осетиядан жаш гимнастла да келгендиле. Турнир быйыл жетинчи кере къуралгъанды.
Русалина эришиуледе жангы программаны кёргюзтюп, жюрини сейирге къалдыргъанды. Къызны тренер Наталья Короткова юйретеди.
Фахмулу спортчу къызчыкъ бизге айтханыча, ол художестволу гимнастика бла мындан ары да кюреширге, жетишимле болдурургъа сюеди. Бютюнда ол эгечле Дина эм Арина Авериналагъа бюсюрейди, алагъа ушаргъа муратлыды. «Бизни республикада уа Гайыланы Амелияны программалары сейирдиле. Ол къатышхан эришиуледе барысында да хорлап барады. Турнирден сора уа бизге Олимпиадалы чемпион Екатерина Галкина мастер-класс бергенди. Анда кёп жангы затла билгенме», - дейди Русалина бизге.
Июньда Нальчикден художестволу гимнастикадан «Тауланы жомакълары» битеуроссей эришиуле боллукъдула. Анга къыралны битеу регионларындан 6 жылдан 15 жылгъа дери эм андан тамата къауумда спортчула жыйыллыкъдыла. Анда Русалина топ, булава эм обруч бла къалай хайырлана билгенин кёргюзтюрюкдю. «Бютюнда обруч бла тепсерге бек сюеме. Булава уа къыйынды, болсада бу эришиуледе битеу къарыууму, билимими кёргюзтюрге кюреширикме», - дейди ол.
