11 июля, 2023 - 11:15
Жыл сайын бардырылгъан «Устазны жылы» эм «Юйретиучюню жылы» конкурслагъа Черек районну школларыны бла сабий садларыны устазлары эм юйретиучюлери тири къатышадыла. Былтыр къуралгъан эришиуде бизни сабий садны юйретиучюсю Чатталаны Фатима биринчи жерни алгъанды.
Быйыл а «Юйретиучюню жылы» Черек районну Къашхатау элини «Нюр» сабий садында кезиулю ётгенди. Ол 11 апрельден 14 апрельге дери бардырылгъанды. Ары районну сабий садларында ишлеген юйретиучюле эм таматала жыйылгъандыла.
Эришиуге къатышхан къызла кеслерини бу жаны бла тюрлю-тюрлю хунерлерин, къол усталыкъларын, сабийле бла ачыкъ дерслерин, презентация ишлерин кёргюзтгендиле. Огъары Малкъардан Герузланы Лейла бла Хуболланы Залина, Бабугентден Аккыланы Римма, Къашхатаудан Къадырланы Альбина бла Фрийланы Аслийжан, Аушигерден Юлия Карова ёсюп келген къызчыкъланы бла жашчыкъланы юйретиуде энчи методикаланы къалай хайырланнганларын туура этгендиле. Жюрини санында уа Жуболаны Марианна, Къулбайланы Амина, Равида Бербекова, Айшаланы Мухадин, Хапаланы Тахир, Римма Шереужева эм Чатталаны Фатима болгъандыла.
Хорлап биринчи жерге тийишли болгъан «Нюр» сабий садны юйретиучюсю Къадырланы Альбинады. Аны себепли ол Нальчикде районну атындан республикалы конкурсха къатышырыкъды. Бахсан районну Атажукино элинде ачыкъ дерс берликди. Лауреатла уа Бабугентден Аккыланы Римма бла Аушигерден Юлия Карова болгъандыла.
Мен Къадырланы Альбинагъа болушханлагъа – Деунежланы Мадинагъа, Бёзюланы Мариямгъа, Тюменланы Джамилягъа, Чатталаны Фатимагъа, Агъайланы Аксанагъа, Геукланы Ирагъа, Аналаны Фатимагъа да жюрек ыразылыгъымы билдирирге излейме. Альбинагъа уа жангы жетишимле, усталыкъ жолунда бийикликле тежейме.
Быллай тюрлю эришиуле педагогика эм юйретиу жаны бла эм иги сынамланы жайыугъа, алчыланы кёллендириуге эмда школгъа дери билим берген педагогланы профессионал усталыкъларын айнытыугъа, аланы эм саулай да школгъа дери билим берген системаны даражаларын ёсдюрюуге бурулупдула. Аны себепли бизни ишибизде аланы магъаналары да уллуду.
