14 ноября, 2023 - 15:32

Жаш тёлюбюз къыралыбызны белгили вузларында окъууда, ишде жетишимлери, хунерлиликлери, бла да айырмалы болгъанлары бла барыбыз да ёхтемленебиз. Аллайладан бири Гайыланы Алинады. Ол кесини эндиге дери алгъан къызыл дипломларына быйыл дагъыда бирин къошханды. Москвада «Сабийлени саулукъларыны миллет медицина тинтиу арасында» ординатураны жетишимли бошап, Медицинадан битеулю къырал экзаменни «бешге» берип, таулу къыз айырмалы дипломгъа тийишли болгъанды. Алай бла уа врач-педиатр усталыкъны алгъанды.
Алина ординатурада «педиатрия» ызда юйреннгенди, сабий кардиологияны жашырынлыкъларына, бу бёлюмде тюбеген башха-башха болумлагъа да тюшюннгенди. Эсигизге салайыкъ, къыралыбызны ара шахарында сагъынылгъан ара сабийледе тюбеген эм къыйын диагнозлагъа бакъгъан эмда багъар ючюн жангы амалланы излеген, тинтген да сынамлы арады.
Кардиологиядан сора да, Гайыланы къызлары усталыгъын педиатрияны тюрлю-тюрлю бёлюмлеринде да ёсдюргенди. Башха-башха белгили профессорланы башчылыкъларында аслам затха юйреннгенди. Кесини усталыгъы бла байламлы аны хар ызыны энчиликлерин билирге итиннгенди.
– Саулукъ сакълауда педиатрия бёлюм – ол абаданлагъа къарагъан терапиячады. Билесиз, терапевтни уа хар бёлюмден да ангылауу болургъа керекди. Белгили профессорладан тюшюннгениме, къыралыбызны эм даражалы араларында врачла, бирси илму ишчиле да къалай уруннганларын кёргениме ыразыма, – дейди кеси да.
Алина ординатураны бюджет бёлюмюне киргенин да белгилерчады. Ол дагъыда РУДН-ни ультразвук кафедрасында адамны чархында хар неге да УЗИ этерча усталыкъгъа да юйренип, анга шагъатлыкъ этген диплом да алгъанды.
Ары дери уа ол Нальчикде 14-чю номерли гимназияны алтын майдал бла бошагъанды. Къайсы усталыкъны сайларыгъыны юсюнден ол кёп сагъыш этемегенди. Нек дегенде гитчелигинден да анасын, КъМР-ни сыйлы врачы Гайыланы Зухураны, жамауат къалай хурметлегенин, аны билимин, адамлыкъ ышанларын да кёргенди, аныча врач болургъа итиннгенди. Муратына жетер ючюн КъМКъУ-ну медицина факультетин къызыл дипломгъа бошагъанды.
Ол аны бла бирге кесибизни университетибизни экономика факультетин да аллай даражалы диплом бла бошагъанды. Студент жылларында, ординатурада да болсун, ол, сынауланы угъай, семестрлени кезиулеринде окъуна бир «тёрт» да алмагъанды.
КъМКъУ-да билим алып тебиреген кезиуюнден башлап, окъуу юйню волонтёр къауумуна къошулгъанды. Аны бирси келечилери бла бирге ахча жыйып, къартла бла сакъатла тургъан интернатха, Сабий юйге да аш-азыкъ продуктла, бирси керекли затланы да элтип, барысындан да ыспас сёзле эшитип тургъандыла. Бу ызгъа атлагъан жыйылыулагъа ол Ростовха, Москвагъа, бирси шахарлагъа да баргъанды.
Пандемия болумгъа тюшюп, студентле дистанцион халда окъугъан кезиуде уа, Республикалы сабий больницаны мурдоруна эм къоркъуулу инфекцияланы госпиталы экинчи кере ачылгъанында, ол «къызыл тийреге» медсестра болуп баргъанды. Ковид бла байламлы болумну ёз сынамы бла кёрюп, саусузлагъа къолундан келгенича болушлукъ этгенди. Анда къошхан юлюшю ючюн КъМР-ни Башчысы Казбек Коковну оноуу бла Сыйлы грамотагъа тийишли болгъанды.
Аны бла да къалмай, хунерли къыз госпитальда ишлеген кезиуюнде жыйышдыргъан сынамын хайырлана, «Дифференциальная диагностика коронавирусной инфекции» темагъа илму иш жазгъанды. Ол а «Скопус» тизмеге кирген даражалы журналда басмаланнганды. Аны дагъыда аслам илму статьясы белгили изданиялада чыкъгъандыла эмда ала бла бирси къыралланы алимлери да шагъырейленирча онг барды. Бу ызда да ол башха шахарлада озгъан жыйылыулагъа, практикалы конференциялагъа къатышханды.
Волонтёрлукъ, илму иш бла да кюреше, «Саулукъ сакълауну жарсыулары студентлени-медиклени кёз къарамлары бла», «Бюгюннгю илму: айныу жоллары эмда жарсыулары», «Жаш алимле медицинада» деген Шимал-кавказ, халкъла аралы, битеуроссей конференциялагъа да университетни келечиси болуп баргъанды. Бу жаны бла болдургъан жетишимлери, айырмалы окъугъаны эмда жамауат ишге тири къатышханы ючюн окъуу юйню ректоруну Ыразылыкъ къагъытларына бла Сыйлы грамоталарына кёп кере тийишли болгъанды.
Дагъыда Гайыланы къызлары тыш къыраллы тиллеге кеси аллына тюшюнеди. Ингилизча, тюркча да эркин сёлешеди. Битеу да кесини жетишимлери ючюн атасы Муратха, анасы Зухурагъа бла къарындашы Азаматха ыразыды. Ала аны не заманда да кёллендиргенлей, билимине ышаныргъа, таукел болургъа юйретгенлей, жашауда кёп затха тюшюндюргенлери ючюн.
Бюгюнлюкде уа Алинаны энди аспирантурагъа кирирге мураты барды. Хунерли, билимли къызны сабий кардиология жаны бла окъууун ёсдюрюрге кесибизни университетибизде, Москвадан да белгили профессорла чакъырып турадыла. Сёз ючюн, таулу къызгъа кандидат диссертациясына башчылыкъ этерге, аны бла бирге илму жаны бла да ишлерге ыразылыгъын РАЕН-ни академиги, РФ-ни сыйлы врачы, медицина илмуланы доктору, РУДН-ни бла РНИМУ-ну педиатрия кафедраларыны профессору, сабий кардиолог, инфекционист, Россейни сабий кардиологларыны ассоциациясыны вице-президенти Елена Александровна Дегтярёва кеси билдиргенди.
Педиатрияны «кардиология» ызын теренирек билиуде сайлауун тохташдыргъан жаш врач, усталыгъын къайда ёсдюрсе да, жашагъан, ишлеген да туугъан жеринде этеригин айтады. Къадарын саусуз сабийлени аурууларын селейтир, аланы багъыуда хайырлы болурча эмда себеплик этерча амалланы излеу эмда хайырланыу бла байламлы этеригине ийнанады. Иши бла байламлы жыйышдыргъан ёз сынамын къагъытха тюшюре, алай бла медицина илмугъа къошумчулукъ этер муратдады.