28 ноября, 2023 - 13:59
Бюгюнлюкде Хасанияда жашагъан Байсолтанланы Къурман-Алийни бла Аминатны къызы Сулия сабий чыгъармачылыкъны «Кюн шахар» академиясыны лицейин быйыл бошагъанланы санындады. Окъууда болдургъан жетишимлери ючюн а алтын майдалгъа да тийишли болгъанды.
Гитчелигинден да Сулия жаланда «бешлеге» окъугъанды. Эм алгъа Нальчикде отуз тёртюнчю номерли прогимназиягъа жюрюгенди. Ызы бла уа экинчи школ-лицейде билим алгъанды. Мектепде иги окъугъан къызчыкъ алтынчы классны тауусханындан сора сагъынылгъан академияда жай айлада «Математикалы смена» деген ат бла къуралып озгъан лагерьге барады.
Ма анда болгъанында мындагъы устазла къалай ишлегенлерин, къаллай онгла, болумла да барлыкъларын кёрюп эмда сезип, лицейде билим алыргъа кёлленеди. Алай а ары окъургъа кирир ючюн математикадан бла орус тилден сынаула да берирге керек болгъанды. Аланы да жетишимли берип, къызчыкъ жетинчи классха хунерли сабийле жюрюген лицейге баргъанды.
Белгилегенибизча, Сулия анда да «бешлеге» окъуй, башха-башха дерследен шахар, республика эмда къырал даражалы олимпиадалагъа эмда бирси эришиулеге, конкурслагъа да къатышып тургъанды. Алай бла «Кюн шахарны», кесини атын да айтдыргъанды.
Химия бла биология дерслени бирсиледен айырып сюйгени себепли аладан эришиулеге да асламыракъ къатышханды. Сёз ючюн, тогъузунчу классда болгъанында Окъуучуланы битеуроссей предмет олимпиадаларында экологиядан регионда алчылыкъны алгъанын белгилерчады. Хорлам болдургъаны ючюн а КъМР-ни Башчысы Казбек Коковну премиясы бла да саугъаланнганды.
Эсгерте кетейик, быллай олимпиадалада экология эм къыйынладан бириди. Ол биологияны бир кесеги болгъаны себепли Сулиягъа да сейир кёрюннгенди. Аны хазырлагъан а Гузиланы Хусейн Юсупович болгъанды.
Байсолтанланы къызчыкълары экологиядан аллай эришиулеге онунчу, онбиринчи класслада да къатышып, аланы регион урумунда призёр даражагъа чыкъгъанды. Биологиядан бла экологиядан школчуланы «Ломоносов» атлы олимпиадаларыны ахыр бёлюмюне да къатышып, жетишимли болгъанды.
Лицейни химия-биологиялы профильли классына да онунчудан жюрюп башлагъанды. Окъууну бошай, Бир къырал экзаменлени берирге да аланы айыргъанды. Сайлау халда берилген сынауладан биринчисинден – химиядан а 93 баллгъа тийишли болгъанды. Аллай бийик эсеби ючюн устазы Валентина Батиевна Куашевагъа бла репетитору Лариса Петровна Борисовагъа ыразылыгъын билдиреди. Биологиядан бла мурдорлу математикадан «бешле» алгъанды.
Дагъыда 93 баллгъа ол борчлу халда берилген орус тилден сынауну жазгъанды. Бу дерсни жашырынлыкъларына аны устазы Тамара Башировна Кокова бла репетитору Макытланы Танзиля Тахировна тюшюндюргендиле. Аллай эсеби ючюн а Сулия аланы экисине да ыспас этеди.
Экзаменлеге бара туруп, бирсилеге жарсымаса да, биология къыйын предмет болгъанын, андагъы информацияны ёлчеми асыры кёплюгюн эсгерте, андан бир кесек апчыгъанын жашырмайды. Алай эсе да, алгъан белгиси аны къууандыргъанды. Алай бла уа, биз да къызчыкъны жетишимлерине къууаннганыбыз бла бирге, ол алтын майдалына кертиси бла да тийишли болгъанын кёребиз.
Кесине усталыкъгъа саулукъ сакълауну сайлагъанды. Медицина факультетге Москваны бла Санкт-Петербургну белгили окъуу юйлерине бергенди къагъытларын. Ол ара шахарыбыздагъы Сеченов атлы биринчи къырал медицина университетде окъургъа талпына эди, муратына жетгенди. Артда уа врач-эндокринолог болургъа сюеди. Атасы Къурман-Алий бла анасы Аминат аны сайлаууна ыразы болгъанларына эмда кёллендиргенлери, гитче эгешчиклери Наида бла Алиягъа да кёлюн кётюргенлери ючюн ыразылыгъын айтады. Юйюрде адамларынгы ышаныулукълары, аланы санга тутхучлулукъ этиулери жангыдан-жангы жетишимле болдурургъа кюч бергенлерине да ийнанады.
Алгъадан да сабийле сынаулада, олимпиадалада болдургъан бийик эсепле – ала окъутхан устазларыны билим, хунер даражаларын ачыкълайдыла деген оюм айтыла келеди. Аны алайлыгъын жашау кеси да ачыкълайды. Къалай-алай болса да, школланы бошап, уллу жашаугъа атлам этген жашларыбыз бла къызларыбыз мындан арысында да жетишимли бола, аланы ёсдюргенлени, окъутханланы эмда кеслерини атларын махтау бла айтдырырла деп биз да сакълайбыз эмда ышанабыз.
