16 января, 2024 - 15:34
16 декабрьде Москвада Кремльде VIII халкъла аралы жандауурлукъ кадет бал болгъанды. Анга къыралны 84 регионундан кадет классланы, ведомстволу школланы, Суворов, Нахимов атлы училищелени, аскер-спорт жаш тёлю клубланы юч мингнге жууукъ келечиси къатышхандыла. Быйыл тыш къыралладан жаш адамла да келгенлерин айтырчады, ол санда Замбиядан, Сьерра-Леонеден, Боливиядан, Сириядан, Катардан, Шри-Ланкадан, Белоруссиядан, Узбекистандан, Къыргъызстандан.
Бу сейир къууанчха Нальчикни 2-чи номерли лицейини 9-чу классыны окъуучусу Лёлюкаланы Мурадинни къызы Малика да къатышханды.
Ол кюн Къонакъ арбаз аскерчи кийимледе жаш адамладан бла омакъ жыйрыкълада къызладан толу эди. Ала полонез, вальс, кадриль, миньон эм алача башха сейир тепсеулени кёргюзтгендиле. Малика уа балны сахнасында КъМР-ни сыйлы артисти Астемир Апанасовну биргесине тепсеп, жыйылгъанланы къарсларына тийишли болгъанды.
Малика «Каллисто» тепсеу ансамбльни солистиди, анга башчылыкъны Роман эм Ирина Романихинле этедиле. Таулу къыз кадет балгъа экинчи жыл къатышады, быйыл а ол бютюнда кенг, сейир болгъанын айтады. «Быллай тюбешиуледе къыралны регионларындан нёгерле табаса, мен Сахалинден, Биробиджандан тенглерим бла танышханма. Дагъыда сынам, билим жыяса, кёп жангы затлагъа юйренесе. Биз хореографла, Москвада вузланы устазлары бла да тюбешгенбиз, ушакъ этгенбиз, ала сейир затла айтхандыла. Москвада экскурсияла да къурагъан эдиле. Бек ыразыма быллай сейир ишге къатышалгъаныма», - дейди бизни бла ушакъда Малика.
Аны айтханына кёре, быллай къууанчлы ишле Россейни тарыхыны теренлигин, Ата журтубузгъа сюймекликни ангылатадыла. «Уллу залда жаш адамланы кийимлери, къызланы женгил, накъышла бла жасалгъан узун жыйрыкълары, акъ къол къапла, Къонакъ арбазны болуму, ариу люстрала, макъамла… Ала барысы да бирге жыйылып, кесими 18-19 ёмюрге тюшген суннган эдим. Ол а алай сейир эди», – дейди къыз.
Малика тепсеуле бла гитчелигинден кюрешеди, бютюнда уа фокстротну сюеди. Европалы, латинамерикалы тепсеуле адамны ич дуниясын, сезимлерин, халин ачыкълагъанлары ючюн бюсюрегенин айтады. Болсада кавказ халкъланы тепсеулерин да бек сюеди.
Келир заманда таулу къыз илму бла кюреширге умут этеди, дагъыда журналистикагъа сейири уллуду. Шёндюгю заманда жаш адамла тири болургъа, тюрлю-тюрлю жыйылыулагъа къатышыргъа керек болгъанларын айтады. «Бирле школда дерследен башха бир жерге да жюрюмейдиле. Неда Бир къырал экзаменде тарыхны берликме деп, физиканы, химияны окъумай тебирейдиле. Алай, мен акъыл этгенден, хар неге да юйренирге, нени да билирге керекди. Юлгюге, химияны билмесенг, Чирик кёлле къалай къуралгъанларын ангыларыкъ тюйюлсе», – дейди Малика.
Къызны тамата эгечи Элинаны юсюнден «Заманда» бир ненча кере жазгъанбыз. Ол Москвада вузладан биринде ишлейди. Малика да, тамата эгечини юлгюсюн алып, ингилиз, къытай тиллеге юйренеди, ана тилни да бек сюеди. «Биз юйде тауча сёлешебиз. Школдан ана тил эм адабият бла байламлы конкурслагъа къатышама, адет-тёрелерибизни, миллет тепсеулерибизни бек сюеме. Адам халкъыны тарыхын билирге керекди. Мени уа бир уллу муратым барды – келир заманда таулу халкъны маданиятыны бла тарыхыны арасын ачаргъа», – дейди ол ушагъыбызны ахырында.
