5 мая, 2022 - 15:32
Алгъаракълада Чегем тарында эски эллерибизден бири Думалада болгъан эдим. Сыртны юсюнде орналгъан эл, шёндю ол оюлупду, сау журту жокъду. Кюн чууакъ эди. Жол нёгерим Булунгудан Къулийланы Ибрагимди.
Элни ортасына жете келген жерде буруннгу къабырстан барды. Бир-бир жерлеринде сын ташла да сакъланыпдыла, тёгереги уа таш хунады. Аны оюлгъан жерлери барды. Алайда отлагъан малла ичине киредиле. Ибрагим быйыл, жашланы да жыйып, тозурагъан жерлерин къалап, мал кирмезча этерге деп турады.
Алайдан бираз берлакъ келгенлей, эки орам бирге къошулгъан жерде, уллу тёртгюл таш барды. Аны ортасында тёгерек тешикни кёребиз, жол нёгерим ол таш келиди, дейди.
Кели асламысынада агъачдан, темирден болгъанды. Бу уа таш келиди. Ол неге жарагъанды? Аны ичинде бир зат тюйюп болгъандыла. Сёз ючюн, биширген заманда нартюхню аны ичине атып, кели баш бла тюйгендиле. Кели баш а ол тешикге сыйынырча тёгерек адырды. Ууакълар ючюн анда хант тузну да тюйгендиле.
Ол заманлада келиси болмагъан юй да болмаз эди. Бу уа уллу ташдан ишленнген, баям, битеу орамгъа деп жарашдырылгъан болур эди.